ලෝක සිනමා පුරාවෘත්තයක් වූ ප්‍රවීණ ප්‍රංශ සිනමා නිළියක, නිරූපිකාවක, සත්ව අයිතිවාසිකම් ක්‍රියාකාරිනියක වූ බ්‍රිජිට් බාඩෝ (Brigitte Bardot)අභාවප්‍රාප්ත වී තිබෙනවා.

1934 දී ප්‍රංශයේ පැරිස්හීදී උපත ලැබූ ඇය මිය යන විට ඇය 91 වන වියේ පසුවිය.

ඇයගේ අභාවය පිළිබඳ පුවත තහවුරු කරමින් 'බ්‍රිජිට් බාඩෝ පදනම' (The Brigitte Bardot Foundation) නිවේදනය කළේ, සිය ජීවිතය සත්ව සුබසාධනය වෙනුවෙන් කැප කළ තම ආදරණීය නිර්මාතෘවරිය ශාන්ත-ට්‍රොපේස් හි පිහිටි ඇගේ නිවසේදී අවසන් හුස්ම හෙළූ බවයි.

1950 සහ 60 දශකවල ලෝක සිනමාව තුළ පෙරළියක් ඇති කළ බාඩෝ, 1956 දී තිරගත වූ 'And God Created Woman' චිත්‍රපටය හරහා ජාත්‍යන්තර කීර්තියට පත්විය. ඇය එකල සිනමාවේ නිදහස් සහ නවීන කාන්තාවගේ සංකේතය (Global Icon) ලෙස සැලකුණු අතර, ඇයගේ විලාසිතා ලොව පුරා තරුණ පරපුර අතර මහත් උන්මාදයක් ඇති කළේය.

සිය ප්‍රසිද්ධිය හමුවේ දැඩි පීඩනයකට ලක්වූ බාඩෝ, 1973 දී සිය රංගන ජීවිතයට සමුදීමට තීරණය කළාය. ඒ වන විට ඇය චිත්‍රපට 40කට අධික සංඛ්‍යාවකට සහ ගීත ඇල්බම කිහිපයකට දායක වී තිබුණි. සිනමාවෙන් ඉවත් වූ පසු ඇය සත්ව අයිතිවාසිකම් වෙනුවෙන් සටන් කරන ප්‍රබල ක්‍රියාකාරිනියක බවට පත් වූවාය.

ඇගේ ජීවිතයේ පසුකාලීනව ඇය දැරූ දේශපාලන අදහස් සහ ඇතැම් ප්‍රකාශ නිසා විවේචනයටද ලක් විය. 

කෙසේ වෙතත්, යුරෝපීය සිනමාව නව මාවතකට යොමු කළ රංගන ශිල්පිනියක ලෙස සහ සත්ව අයිතිවාසිකම් වෙනුවෙන් පෙනී සිටි ධෛර්යවන්ත කාන්තාවක ලෙස බ්‍රිජිට් බාඩෝගේ නාමය සිනමා ඉතිහාසය තුළ සදා අනුස්මරණීය වනු ඇත.