පසුගිය(30) වන දා ආරම්භ වූ 11 වන යාපනය අන්තර්ජාතික සිනමා උළෙලේ පස්වන දිනය අද (ජන.03) දින ක්‍රියාත්මක වෙනවා.

අද දින (03) විශේෂයෙන්ම කෙටි චිත්‍රපට සදහා වෙන්වී ඇති අතර, ඒ සමගම තවත් දෙස් විදෙස් වෘත්තාන්ත(feature) චිත්‍රපට කිහිපයක්ම ප්‍රදර්ශන කිරීම සිදුවෙනවා.

 

මතු දැක්වෙන්නේ අද (03) ප්‍රදර්ශනය වන චිත්‍රපට, තිරගත වන ස්ථාන හා වේලාවන් පිළිබඳ විස්තර සටහනකි.

අද (03) දින ජාත්‍යන්තර කෙටි චිත්‍රපට 9ක් කලම් - සංස්කෘතික හමුවීම් සඳහා අවකාශයේදී  පෙ.ව. 10.00 සිට තිරගත වේ.

පස්වරු 1.00ට තවත් ජාත්‍යන්තර කෙටි චිත්‍රපට 9ක් කලම්හි දී තිරගත වේ.

පස්වරු 1.00ට ශ්‍රී ලාංකීය සිනමා කරුවන්ගේ කෙටි චිත්‍රපට 9ක් කාර්ගිල්ස් චතුරස්‍රයේ රීගල් සිනමාහලේ - සිල්වර් ස්ක්‍රීන්හිදී ප්‍රදර්ශනය කෙරේ.

පස්වරු 3.30ට ශ්‍රී ලාංකීය සිනමා කරුවන්ගේ කෙටි චිත්‍රපට 9ක් කාර්ගිල්ස් චතුරස්‍රයේ රීගල් සිනමාහලේ - සිල්වර් ස්ක්‍රීන්හිදී ප්‍රදර්ශනය කෙරේ.

 

පස්වරු 1.00ට ජේඩන් මාර්ටින් (Jaydon Martin)ගේ ‘Flathead’ සිනමා පටය කාර්ගිල්ස් චතුරස්‍රයේ රීගල් සිනමාහලේ - බ්‍රොන්ස් ස්ක්‍රීන්හිදී ප්‍රදර්ශනය කෙරේ.

 

 

‘Flathead’ යනු ඕස්ට්‍රේලියානු ජාතික ජේඩන් මාර්ටින් (Jaydon Martin)අධ්‍යක්ෂණය කළ ප්‍රථම චිත්‍රපටයයි. එය ඔහු විසින්ම රචනා කර අධ්‍යක්ෂණය කළ එකකි. මෙය ඕස්ට්‍රේලියාවේ කම්කරු පන්තියේ ජීවිත ගැන වාර්තා සහ කල්පිත මිශ්‍ර සිනමා කෘතියක් වන අතර, ක්වීන්ස්ලන්ඩ්හි බන්ඩබර්ග් (Bundaberg) නගරය ආශ්‍රිතව ගොඩනැගුණු  කතාවකි. එහි ඕස්ට්‍රේලියානු කම්කරු පන්තියේ නොදකින ජීවිත, සංක්‍රමණික අත්දැකීම් සහ ආත්මික සෙවීම් ගැන සංවේදීව සාකච්ඡා කරයි. ඕස්ට්‍රේලියානු ගම්බද ජීවිතයේ ගැඹුරු ස්ථර සහ මිනිස් තනිකමේ සුන්දරත්වය ගැඹුරින් පිළිබිඹු කෙරේ. මෙය 2024 රොටර්ඩෑම් ජාත්‍යන්තර චිත්‍රපට උළෙලේදී (Tiger Competition) විශේෂ ජූරි සම්මානය දිනා ගත්තේය.

 

කලම්හි පස්වරු 3.30 දර්ශනය වෙන් වී ඇත්තේ Death in Venice by Luchino Visconti (130 mins |1971|Italy) සිනමා පටයටයි.

 

‘Death in Venice’  යනු ඉතාලියේ අධ්‍යක්ෂක ලුකීනෝ විස්කොන්ති (Luchino Visconti) ජර්මන් ලේඛක ‘තෝමස් මාන්’ (Thomas Mann)ගේ  නවකතාවක් ආශ්‍රිතව නිර්මාණය කළ සම්භාව්‍ය සිනමා කෘතියකි.

චිත්‍රපටයේ කතාව වෙනිසියේ ලිඩෝ දූපතේ සිදු වූවකි. සංගීතඥ ගුස්තාව් වොන් අෂෙන්බාක් සිය සෞඛ්‍යය යථා තත්ත්වයට පත් කර ගැනීමට වෙනිසියට පැමිණෙයි. එහිදී ඔහුට ටැඩ්සියෝ නම් පෝලන්ත තරුණයෙකු මුණගැසෙයි.  අෂෙන්බාක්ගේ බැල්ම ටැඩ්සියෝ කෙරෙහි යොමු වෙමින් ආදරයක්, ආසාවක් සහ විනාශකාරී තෘෂ්ණාවක් බවට පත්වෙයි. ඒ අතරේ වෙනිසියේ කොලරා වසංගතයක් පැතිරෙන අතර, නැති වී යන නගරයේ සුන්දරත්වය මෙන්ම කලාකරුවාගේ ජීවිතයද ක්‍රමයෙන් විනාශ වෙයි. වයස්ගත වීම සහ මරණය ගැන සංවේදීව කතා කරන නිර්මාණයක් ලෙස ජාත්‍යන්තරව පිළිගැනීමක් ලැබ තිබෙන මෙම සිනමා පටය කාන්ස් සිනමා උළෙලේදී විශේෂ සම්මානයක්ද දිනා ගත්තේය.

 

පස්වරු 3.30ට කාර්ගිල්ස් චතුරස්‍රයේ රීගල් සිනමාහලේ - බ්‍රොන්ස් ස්ක්‍රීන්හිදී ප්‍රදර්ශනය වන්නේ නදී වාසලමුදලිආරච්චිගේ Pantrum සිනමාපටයයි.

 

‘පැන්ත්‍රම්’ යනු නදී වසලමුදලිආරච්චි අධ්‍යක්ෂණය කළ ප්‍රථම දිගු චිත්‍රපටයයි. සිනමාපයේ තිරරචනය සහ සම-නිෂ්පාදනය ද කර ඇත්තේ ඇය විසිනි. මෙය පර්යේෂණාත්මක සිනමා පටයක් වන අතර, ශ්‍රී ලංකාවේ යුද්ධයෙන් පසුව ඇති වූ ව්‍යසනකාරී බලපෑම්, ළමා සොල්දාදුවන්ගේ අරගල,  සහ සංහිඳියාවේ ගමන පිළිබඳ ගැඹුරින් කියැවෙන කතාවකි.

ළමා කාලයේ සෙල්ලම් කරන කුඩා කෘමියෙකුගේ සංකේතයක් ලෙස යොදාගෙන, යුද්ධයේ ගොදුරු වූ මිනිසුන්ගේ ජීවිතවල අසරණභාවය, තුවාල සහ ජීවත්වීමේ අරගලය සියුම්ව නිරූපණය කෙරේ. චිත්‍රපටය කේරළයේ Independent & Experimental Film Festivalහි ලෝක මංගල දර්ශනය ලැබූ අතර, ජාත්‍යන්තරව ඇගයීමට ලක්ව තිබේ.

 

පස්වරු 6.15 කාර්ගිල්ස් චතුරස්‍රයේ රීගල් සිනමාහලේ - බ්‍රොන්ස් ස්ක්‍රීන්හි දී විමුක්ති ජයසුන්දරගේ  ‘සුළඟ එනු පිණිස’ සිනමාපටය ප්‍රදර්ශනය කෙරේ.

 

‘සුළඟ එනු පිණිස’ (The Forsaken Land) විමුක්ති ජයසුන්දරගේ අධ්‍යක්ෂණය කළ කුළුඳුල් චිත්‍රපටයයි.  මෙය 2005 කාන්ස් චිත්‍රපට උළෙලේදී හොඳම කුළුඳුල් චිත්‍රපටයට හිමි සම්මානය දිනාගත් කෘතියක් වන අතර, ශ්‍රී ලංකාවේ සිවිල් යුද්ධයේ සෙවණැලි තුළ ජීවත් වන මිනිසුන්ගේ චිත්තවේගීය ස්වභාවය, අනන්‍යතාවයේ අර්බුදය සහ මරණයේ නිහඬ බලපෑම ගැඹුරින් ස්පර්ශ කරන නිර්මාණයකි. චිත්‍රපටයේ කතාව යුද්ධයෙන් විනාශ වූ දුරස්ථ භූමියක (no-man's-land) ජීවත් වන පවුලක් වටා ගෙතෙයි. අනුර නම් ආරක්ෂක සෙබළෙකු තනිකමෙන් පීඩිතව ජීවත් වෙමින්, ඔහුගේ බිරිඳ, නංගි සහ ඔවුන් රැකබලා ගන්නා කුඩා දැරිය සමඟ දිනපතා ජීවිතයේ නිහඬ අරගලයට මුහුණ දෙයි. යුද්ධය නැවතුණු පසුවත් රැඳෙන බිය, තනිකම සහ චිත්තවේගීය හිස්බව මෙහිදී ඉතා සියුම්ව එළිදරව් වෙයි. මෙය නිකුත් වූ කාලයේ ශ්‍රී ලංකාවේ තහනම් කෙරුණු චිත්‍රපටයක් වීමද විශේෂත්වයකි. නමුත් ජාත්‍යන්තරව ඉතා ඉහළින් ඇගයුණු මෙම කෘතිය ශ්‍රී ලංකාවේ නව සිනමා යුගයේ ආරම්භයක් ලෙස සැලකෙයි.

 

පස්වරු 6.15ට කාර්ගිල්ස් චතුරස්‍රයේ රීගල් සිනමාහලේ - සිල්වර් ස්ක්‍රීන්හිදී ප්‍රදර්ශනය කෙරෙන්නේ Chole Abrahamගේ The Taste of Mango සිනමාපටයයි.

 

The Taste of Mango ක්ලෝයි ඒබ්‍රහැම්ස් (Chloe Abrahams) අධ්‍යක්ෂණය කළ ප්‍රථම චිත්‍රපටයයි. ඇය විසින් රචනා කර රූගත කර, සහ සංස්කරණය කළ වාර්තා චිත්‍රපටයකි. මෙය පවුල් සබඳතා, ස්මරණයන්, අනන්‍යතාවය, ප්‍රචණ්ඩත්වය සහ ආදරය ගැන සංවේදී, සිහිනමය පෙම් හසුනක් මෙන් ගෙතුණු කෘතියක් වන අතර, පරම්පරා තුනක කාන්තාවන්ගේ නොකියූ ජීවිතය ගැඹුරින් එළිදරව් කරයි. මෙය 2023 True/False උළෙලේදී ලෝක මංගල දර්ශනය ලැබූ අතර, BFI London Film Festivalහි Audience Award for Best Documentary සහ BIFAහි Best Debut Director – Feature Documentary දිනා ගත්තේය. ජාත්‍යන්තරව ඉතා ඉහළින් ඇගයුණු මෙම චිත්‍රපටය මගින් තුවාල සුව කිරීමේ (healing) බලය සහ කැමරාවේ චිකිත්සක භූමිකාව ගැනද කතා කරයි.

 

සිනමා උලෙළෙහි සමාප්තිය හෙට දින, 2026 ජනවාරි 04 වැනිදා ‍යාපනයේ කාර්ගිල්ස් චතුරස්‍රයේ රීගල් සිනමාශාලාවේදී සිදු කෙරේ. අවසාන චිත්‍රපටය ලෙස ශ්‍රී ලාංකික චිත්‍රපට නිර්මාණකරු අශෝක හඳගමගේ ‘සඳ දඩයම’ (Moon Hunt) තිරගත වේ. හෙට තිරගත වන්නේ එහි ලෝක මංගල දර්ශනය යි.